सरकारविरोधात शेतकऱ्यांचा एल्गार, परभणीत उभारली काळी गुढी

परभणीत काळी गुढी परभणीत शेतकऱ्यांचे आंदोलन, सरकारला दिला इशारा 

परभणी: राज्य आणि केंद्र सरकारच्या शेती व शेतकरीविरोधी धोरणांविरोधात रविवारी (३० मार्च) परभणी जिल्हाधिकारी कार्यालयासमोर स्वाभिमानी शेतकरी संघटनेने काळी गुढी उभारून निषेध व्यक्त केला.

विधानसभा निवडणुकीच्या प्रचारात महायुती सरकारने १०० दिवसांत शेतकऱ्यांना संपूर्ण कर्जमुक्ती आणि हमीभावापेक्षा १०% जास्त भाव देण्याचे आश्वासन दिले होते. मात्र, चार महिने उलटूनही कर्जमुक्ती झाली नाही आणि नुकतेच उपमुख्यमंत्री अजित पवार यांनी शेतकऱ्यांना ३१ मार्चपर्यंत पीक कर्ज भरण्यास सांगितले. यावरून शेतकऱ्यांमध्ये नाराजी आहे.

या आंदोलनात किशोर ढगे, रामप्रसाद गमे, गजानन तुरे, मुंजा लोडे, आदिनाथ लवंदे, प्रसाद गरुड, माउली शिंदे, सुदाम ढगे, उद्धव जवंजाळ, विकास भोपळे, पिना पाटील, सुधाकर खटिंग, रणजित चव्हाण, हनुमान अमाले, सय्यद कलीम, नामदेव काळे आदी सहभागी होते.

यावेळी बोलताना किशोर ढगे म्हणाले, "राज्य सरकार शेतकऱ्यांच्या बाबतीत विश्वासघात करत आहे. त्यांनी दिलेले आश्वासन पाळले नाही आणि आता पीक कर्ज भरण्यासाठी दबाव टाकत आहेत. यामुळे शेतकऱ्यांमध्ये प्रचंड असंतोष आहे."

रामप्रसाद गमे यांनी सांगितले, "शेतकऱ्यांची आर्थिक परिस्थिती बिकट असताना, सरकार त्यांच्यावर आणखी दबाव टाकत आहे. हे अन्यायकारक आहे आणि याविरोधात आम्ही लढा सुरू ठेवणार आहोत."

या आंदोलनात शेतकऱ्यांनी सरकारविरोधात जोरदार घोषणाबाजी केली आणि त्यांच्या मागण्या पूर्ण करण्याची मागणी केली. आंदोलनानंतर जिल्हाधिकाऱ्यांना निवेदन देण्यात आले.